/*Google Analytics*/

Sex, Drugs and Rock'n Roll

Tinu git Vougas!Nach 6 Jahr Toskana-Abstinänz hei mir Aemmitaler (zäme mit üsne Froue) wider einisch wöue ga luege ob der schlafend Jäger ändlich erwachet sig u ob der Brutalo zum Softy worde isch.

Obwohl mir gwüsst hei, dass glychzitig e Lady-Bikewuche stattfingt, hei mir eigentlich nüt angers als ds Bike im Sinn gha u vilech no öppe e Schnupf u es Moretti wöue gniesse. Aber oha lätz, bim Begrüessigsapéro isch über Sex, Drugs und Rock'n Roll u sogar vo Massage bir Roberta gmunklet worde. Das het bim eint oder angere vo üs Erinnerige a die späte 70-er Jahr gweckt u d'Fantasie agregt.

Wenn aber churz nach em Zmorgeässe der Canyon-Uphill ueche chrampfisch u söttsch acheschalte u kei Gang meh fingsch, denn vergö dir diner Tröim. Du däichsch nümme a Florian Ast mit sim "Sex mit der Gaabe, vom Morge bis Aabe", höchschtens no a Gölä mit sim "Staub uf der Lunge". U wenn der Housi obe am Canyon erklärt was das mit em Sex uf sich het, dass das der Name vo mene Uphilltrail u Rock'n Roll vo mene Downhilltrail isch, denn tuet dir e Schnupf dopplet guet.

Mir hei der Schnupf aber nid als Troschtpflaschter bruucht, sondern zum üser Nase nach super Uphills mit viiu Serpentine für ewiglängi Downhills freizmache u alls angere chönne zvergässe. Wer üs gseh het nidsi donnere, über jedes Högerli e Jump mache u derzue no juchze, dä hätt nid dänkt, dass mir scho d 70-er Jahr mitgmacht hei.

I de letschte Jahr si rund um Massa viiu nöii, wunderschöni Up- und Downhills bauet worde. Merci all dene wo dä Chrampf vom Trailbaue immer wider uf sich näh u üs es Bikeparadies präsentiere. Ob Afängere oder Crack, ob jünger oder älter, Beers u ihres Team heis wider einisch gschafft für alli die richtige Trails z finge. Bsungers guet acho isch bi de Froue der Usflug uf Elba. Sie hei möge rüehme u schwärme u drum der Housi uf Hände treit.

Unfäll hei mir glücklicherwiis keiner gha u ou Plattfüess het's nume eine gä. Dä het aber de grad 3 Ma beschäftiget bis sie dä Schiss-Pneu vo der Fälge gha hei. Wäge der Panne si d Froue denn ou während der einzige Rägestung ungerwägs gsy u seichnass worde. Räge macht bekanntlich ….., aber das het e keini vo dene "Töchtere" ir Lady-Bikewuche nötig gha.

Nid nume mtbeer het e super Job gliferet, ds ganze Cicalino-Team, vor Putzfrou über e Choch bis zur Roberta het zum Erfolg vo dere Wuche bitreit, merci viumau.

Guet gschnupft isch halbe biked:

Tom, Housi, Daniela u Erika, chönnte üs uf jedem Trail la stah,
sie tües aber nid übertrybe, si wei dass mir die ganzi Wuche blybe
Sex-Uphill, Rock'n Roll oder Nino-Trail, bike mit mtbeer isch eifach geil. Priis.

Tinu

Samstag, 21. September 2019

KONTAKT

mtbeer-Bikeschule & Solutions gmbh
Gartenstrasse 26
CH-3800 Unterseen

Tel/Fax:  +41 (0) 33 822 84 92
e-M@il: info@mtbeer.ch 

mtbeer auf Facebook YouTube mtbeer auf Vimeo  mtbeer auf Instagram  mtbeer auf Twitter  mtbeer auf Pinterest  

mtbeer.ch nutzt Cookies, um bestmögliche Funktionalität bieten zu können. [ mehr Infos ]